Cumbatter la povradad munta mantegnair las contribuziuns da maternitad


En sia missiva (pagina 967) parta la regenza dal fatg, ch’igl vegnia inoltrà pli paucas dumondas per sustegn, d’ina vart pervia da l’aboliziun da las contribuziuns da maternitad e da l’autra vart pervia da la betg-utilisaziun da l’agid social. Quai vuless dir, che la regenza va or da quai, ch’i dettia en futur pli paucas dunnas* ed uffants pertutgad*as che vegnan sustegnid*as da las tariffas pli bassas da l’agid social. Questa argumentaziun è cinica. La regenza maina ina politica da famiglia sin il dies da las persunas las pli paupras! Exact entras l’aboliziun da las contribuziuns da maternitad perdan las persunas las pli deblas en nossa societad sustegn temporar ch’è essenzial per ellas ed entras quai la pussaivladad da surpigliar la rolla da geniturs durant ils emprims 10 mais suenter la naschientscha. L’experientscha dals ultims 30 onns mussa cleramain che las contribuziuns da maternitad èn ina contribuziun effectiva per il cumbat cunter la povradad – nun-cumplitgà, effectiv ed in vair sustegn per famiglias cun difficultads finanzialas!
Spezialmain nausch è questa reducziun da las prestaziuns socialas perquai che famiglias grischunas èn effectuadas spezialmain ferm da paupradad. In terz da las persunas che retiran agid social en il chantun èn uffants e giuvenil*as. Organisaziuns d’agid dal chantun Grischun percorschan quest fatg gia oz en lur lavur quotidiana. Sche famiglias èn gia ina giada stadas dependentas da l’agid social èsi spezialmain grev per ellas da puspè star finanzialmain sin atgnas chommas. L’experientscha da questas instituziuns mussa era quant aut che la retegnientscha è per famiglias d’insumma dumandar tar l’agid social per sustegn. Il chantun faschess dal bain, sch’el rinforzass la prevenziun da paupradad, empè da sminuir prestaziuns socialas per famiglias. Per regla èn era auters problems e tendenzas d’exclusiun connectadas cun paupradad, tge ch’ha en spezial per uffants e giuvenil*as consequenzas fatalas.

Custs supplementars per vischnancas


Contribuziuns da maternitad paja il chantun. Entras l’aboliziun da quellas augmentan persunas e famiglias pertutgadas en futur ils custs d’agid social da las vischnancas. Il chantun accentuescha, ch’el vegnia a sa participar entras la gulivaziun da las grevezzas socialas als custs. Quai è dentant mo il cas per ina pitschna minoritad da las vischnancas. ¾ da las vischnancas survegnan numnadamain insumma nagut da la gulivaziun da las grevezzas socialas. La maioritad resta suletta cun quests custs. Ultra da quai creschan ils custs administrativs tar las vischnancas, ch’ellas ston medemamain pajar sez. Sper las famiglias perdan pia era las vischnancas.

Ils emprims mais da vita èn marcants

L’arrivada d’ina nova commember/-ra da famiglia è in eveniment allegraivel. Ils emprims mais èn centrals per il svilup da l’uffant, per l’emprender d’enconuscher l’ina l’auter e per bajegiar si fidanza ed il liom. L’uffantin e la mamma sa chattan corporal- e mentalmain en ina simbiosa. Questa fasa dal bonding è fitg impurtanta, sa dentant mo succeder optimalmain sche la mamma po sa deditgar senza temas d’existenza economicas a ses uffant.
Ina gronda part da las retschavidras da las contribuziuns da maternitad èn educaturas sulettas. Savens èn quellas mammas anc en scolaziun – il sforz economic da cumenzar a lavurar sminuis las perspectivas per l’avegnir da questas dunnas* evidentamain. D’accumpagnar ils emprims mais da vita da l’uffant, da dar latg senza stress, quai èn experientschas unicas e custaivlas. Nagina mamma e nagin uffant duess desister da quai ord motivs materials.

Tge è l’indemnisaziun da maternitad da la SVA?

Mammas che lavuran retschaivan en Svizra durant 14 emnas suenter la naschientscha da lur uffant 80% da lur ultima paja. Quai entras l’urden da cumpensaziun dal gudogn (UCG/EO). Cura ch’ins ha instradà questa segiranza èsi stà clar, ch’i n’è betg realistic ch’ins lavura puspè cumplain suenter quellas 14 emnas. Da lez temp devi la pretensiun che famiglias duessan s’organisar finanzialmain sin basa privata. Oz fan bleras mammas ed era intgins babs suenter quellas 14 emnas in congedi betg-pajà e/u reduceschan lur pensum da lavur. Pussaivel è quai dentant mo sche il/la patrun*a dat il consentiment e sche la famiglia viva en bunas relaziuns finanzialas. Bleras dunnas e pèrs na san betg sa prestar quest congedi nun-pajà ubain ina reducziun dal pensum da lavur.
Exact là dovri las contribuziuns da maternitad che sustegnan mammas ch’educheschan sulettas e geniturs giuvens ch’èn anc en scolaziun, persunas ch’èn pertutgadas da paupradad, famiglias nua che mo in genitur lavura e famiglias working-poor durant ils emprims 10 mais suenter la naschientscha da l’uffant.
Quai tranter auter cun la finamira, che era persunas cun in pitschen budget san sa prender il temp per la famiglia suenter quellas 14 emnas cun indemnisaziun da maternitad. Tenor la missiva eran l’onn 2018, 39% da las persunas che han retratg contribuziuns persunas ch’educheschan sulettas e 61% famiglias cun dus geniturs. Durant ils 10 mais èn pro cas vegnids pajas or mintga mais CHF 2’340.-.
L’agid social pretenda bler dapli detagls da la situaziun da vita da las persunas pertutgadas e la calculaziun concreta è vasta e per part cumplitgada. Las tariffas èn – sco quai ch’ins vesa sin il check dals fatgs che suonda – per part fermamain pli bass. Tar in budget da chasada bass, contribuescha mintga franc ad ina situaziun finanziala pli agreabla. Tar la validaziun d’in dretg sin agid social datti ulteriurs obstachels sco la reducziun da la facultad, sustegn dals parents – questas barrieras san manar tar las persunas pertutgadas tar ina renunzia da la dumonda. Entras quai vegnan las cundiziuns per ils geniturs pertutgads e lur uffants mendras, e pli tard era il start enavos en la vita professiunala pli grevas.

Tut en tut in emballadi fauss

Il chantun Grischun ha in problem cun ina fitg auta povertad da famiglias. Quest project da votaziun megliurescha per las famiglias pertutgadas insumma nagut, cuntrari el fa la situaziun massiv mendra. Plinavant simulescha el in meglierament da la tgira d’uffants cumplementara a la famiglia. Quai n’è dentant betg dapli che in dagut en la mar, damai ch’el na sminuescha ni las tariffas per geniturs, ni datti in meglierament substanzial per las purtadras ed ils purtaders da la tgira d’uffants cumplementara a la famiglia.
Ultra da quai menziunescha la regenza en sia missiva che las contribuziuns da maternitad sajan in stimul d’acquist negativ (pagina 942). Quest argument è absurd. Persunas ch’èn avisadas sin agid social han pli paucs meds da sustegn finanzials e pli auts obstachels per retschaiver il sustegn che quai ch’igl è oz il cas tar las contribuziuns da maternitad. Quai engrevgescha pli tard il pass en la vita professiunala.
Plinavant gidan las contribuziuns da maternitad a geniturs cun relaziuns finanzialas modestas, per ch’els pon sa deditgar sez a la tgira da lur uffants. A questa finamira èn stimuls per ina lavur pajada parallela betg gist nizzaivels – gia il pensum da lavur da maximal 50% ch’è fixà tar las contribuziuns da maternitad è al cunfin. Cas cuntrari na sa il genitur che tgira l’uffant betg sa deditgar avunda a la tgira da l’uffant novnaschì!
Tut en tut è quest project da votaziun in emballadi fauss e fa sulettamain pli debel las persunas las pli paupras en nossa societad! Lain dar a tut ils uffants in futur e schain NA a l’aboliziun da las contribuziuns da maternitad.

Argumentari lung