En curt

Il Cussegl grond ha decidi en sia sessiun d’avust 2020 d’abolir la lescha da las contribuziuns da maternitad. Pervia da l’aboliziun da las contribuziuns da maternitad stuessan radund 250 persunas (media dals onns 2009 enfin 2018) desister mintg’onn da quest agid nuncumplitgà, tge che correspunda a radund 5% da tut las famiglias cun uffants novnaschids.
Entras l’aboliziun da las contribuziuns da maternitad vegnissan questas persunas stuschadas en l’agid social. Sche lur dumondas per agid social vegniss approvà, survegnissan quellas persunas contribuziuns d’agid essenzialmain pli bassas, tge che cuntradi a l’idea da basa da las contribuziuns da maternitad.
Contribuziuns da maternitad paja il chantun. Entras l’aboliziun da quellas augmentan persunas e famiglias pertutgadas en futur ils custs d’agid social da las vischnancas.

Quant savens vegnan las contribuziuns da maternitad duvradas?


Tenor la missiva da la regenza hai dà ils onns 2009 enfin 2018 mintg’onn radund 80 cas cun 247 persunas pertutgadas (mammas, novnaschid*as, ev. babs ed ulteriurs uffants). Ils custs annualas per il chantun muntan en media a CHF 800’000.-.

Pertge duess la lascha vegnir abolida?


Sin proposta da la regenza ha la maioritad dal Cussegl grond decidì la stad 2020 d’abolir la lescha da las contribuziuns da maternitad e da duvrar ina part dals meds finanzials che vegnan spargnads per sustegnair la tgira d’uffants cumplementara a la famiglia. La regenza scriva en sia missiva che la lescha mainia tar in impuls sbaglià tar ils geniturs, perquai che la lavur remunerada dals geniturs saja nungiavischada e damai ch’il dretg sin contribuziuns scrodia tar in pensum da lavur da dapli che 50%. Quai na saja betg favuraivel per l’economia – ina politica da famiglia moderna rinforza la cumpatibilitad da professiun e famiglia. Nossa opiniun è che la finamira da las contribuziuns da maternitad consistan gist dal fatg da pussibilitar a geniturs ord relaziuns modestas d’almain pussibilitar la tgira persunala dal uffant durant ils emprims 10 mais.

Tge è l’alternativa tar las contribuziuns da maternitad?


Tenor la missiva duessan famiglias en situaziuns finanzialas difficultusas plazzar lur dumondas en futur tar l’agid social.

Pertge essan nus encunter?


Quest quint na va betg si: ils dus sistems èn memia differents. Agid social na remplazza betg las contribuziuns da maternitad. Questa midada faschess massiv mender la situaziun per las persunas pertutgadas. Retrair agid social n’è betg simpel. Anc adina èsi grev per bleras persunas dad ir per agid social. Sch’ins è ina giada dependent da l’agid social èsi grev da puspè extrar da quel. In ulteriur obstachel: La dumonda per agid social sa drizza a la singula vischnanca da domicil – cuntrari a las contribuziuns da maternitad che vegnan decididas da l’uffizi social chantunal per incumbensa dal servetsch social regiunal. Nus essans persvadidas che persunas pertutgadas pondereschan gia ord quest motiv sch’ellas vulessan insumma ir la via sur la vischnanca. Tgi che sa retrair contribuziuns da maternitad na ha betg automaticamain era il dretg sin agid social. Tgi che ha ina plazza da lavur u che lavura independent, survegn sin basa da la schliaziun da maternitad naziunala durant 14 emnas suenter la naschientscha, 80% da l’ultima paja via l’Institut d’assicuranza sociala (SAV) chantunal en furma d’ina indemnisaziun da maternitad. La gronda part dals geniturs en Svizra provan da sa cunvegnir cun il/la patruna da lavur suenter quellas 14 emnas da pudair far in congedi nunpajà pli lung ubain da reducir il pensum da lavur. Quai damai che nus n’avain en Svizra nagin congedi da geniturs. Ina pausa nunpajada pli lunga è mo pussaivla sch’ils meds finanzials èn avant maun. Per persunas ch’educheschan sulettas, famiglias working-poor ubain pèrs en scolaziun n’è quai per il pli betg pussaivel. Persunas cun in contract da lavur n’han nagin dretg da dumandar per agid social e stuessan – sin basa da la missiva da la regenza – puspè lavurar 100% suenter quellas 14 emnas.
Uschia maina l’aboliziun da las contribuziuns da maternitad tar ina reducziun da las prestaziuns socialas sin custs da las persunas las pli paupras. E quai cumplainamain senza motiv finanzial, damai ch’il chantun ha in enorm agen chapital da radund 2.5 milliardas francs e fa regularmain gudogns.
Plinavant sa spostan incumbensas dal chantun sin las vischnancas. Las contribuziuns da maternitad paja il chantun – agid social pajan las vischnancas.